(કાજર બારીઆ)
શિક્ષણ અને સેવાના ત્રિવેણી સંગમ સમાન એક પ્રેરણાદાયી પ્રસંગ કાછેલ ગામમાં જોવા મળ્યો હતો. કાછેલ (કા) પ્રાથમિક શાળા તેમજ ધાનક ફળીયા વર્ગ શાળાના તમામ જરૂરિયાતમંદ વિદ્યાર્થીઓને શાળાના ગણવેશ (યુનિફોર્મ) તેમજ બૂટ (સૂઝ)નું વિનામૂલ્યે વિતરણ કરવામાં આવ્યું હતું. ગામના જ જાગૃત અને સેવાભાવી આગેવાન લલિતભાઈ કાળુંભાઈ રાઠવા દ્વારા આ ઉમદા કાર્ય માટે દાતા બનીને સમગ્ર ખર્ચ ઉપાડી લેવામાં આવ્યો હતો, નાનકડી મદદ અને પ્રોત્સાહન થી બાળકોના ચહેરા પર ખુશીની લહેર જોવા મળી.
નવા શૈક્ષણિક સત્રની શરૂઆત સાથે જ બાળકોને નવો ગણવેશ અને બૂટ મળતા વિદ્યાર્થીઓમાં ભારે ઉત્સાહ અને આનંદનો માહોલ જોવા મળ્યો હતો ,લલિતભાઈના આ સરાહનીય પગલાથી ગરીબ અને મધ્યમ વર્ગના હાલમાં ખેતી કામ માટે આર્થિક સંકડામણ અનુભવતા વાલીઓને મોટી આર્થિક રાહત મળી છે અને ગામના આગેવાનની ઉદારતાને બિરદાવવામાં આવી હતી, આ પ્રસંગે શાળાના આચાર્ય શિક્ષકગણ તેમજ શાળા વ્યવસ્થાપન સમિતિ (SMC) દ્વારા લલિતભાઈ રાઠવા નો હૃદયપૂર્વક આભાર વ્યક્ત કરવામાં આવ્યો હતો. ગ્રામજનોએ પણ જણાવ્યું હતું કે, પોતાના જ ગામના બાળકોના શિક્ષણ અને સુવિધા માટે આગળ આવીને લલિતભાઈએ સમાજ માટે એક ઉત્કૃષ્ટ ઉદાહરણ પૂરું પાડ્યું છે.
