(મયુર જાની)
લીમખેડા તાલુકાના દુધિયા ગામેથી પોલીસે જાહેરમાં જુગાર રમતા છ શખ્સોને ઝડપી પાડ્યા છે. આ કાર્યવાહી દરમિયાન કુલ 32,650નો મુદ્દામાલ જપ્ત કરવામાં આવ્યો હતો. લીમખેડા પોલીસ સ્ટેશનને દુધિયા ગામના તળાવ ફળિયામાં કેટલાક ઇસમો ગંજી પત્તા વડે જુગાર રમી રહ્યા હોવાની ચોક્કસ બાતમી મળી હતી. આ બાતમીના આધારે પોલીસ ટીમે સ્થળ પર દરોડો પાડ્યો હતો.પોલીસને જોઈને જુગારીઓમાં દોડધામ મચી ગઈ હતી અને તેઓ ભાગવાનો પ્રયાસ કરવા લાગ્યા હતા. પોલીસે ત્વરિત કાર્યવાહી કરીને કોર્ડન કરી ભાગી રહેલા ઇસમોને પકડી લીધા હતા. પકડાયેલા ઇસમોએ તેમના હાથમાં રહેલા પત્તાઓ ઘટનાસ્થળે જ ફેંકી દીધા હતા.પોલીસે પકડાયેલા શખ્સોની અંગજડતી અને દાવની રકમ જપ્ત કરી હતી. સ્થળ પરથી રોકડા ₹10,300, દાવ પરના રોકડા ₹2,350, 20,000ની કિંમતના ચાર મોબાઈલ ફોન તેમજ ગંજી પત્તાના પાના કબજે કરવામાં આવ્યા હતા. કુલ 32,650નો મુદ્દામાલ જપ્ત કરી પોલીસે કાયદેસરની કાર્યવાહી હાથ ધરી છે.
પોલીસે પકડાયેલા આરોપીઓની ઓળખ જાહેર કરી છે, જેમાં જગદીશપીઠાયા (ઉં.વ. 23), આદેશ પીઠાયા (ઉં.વ. 21), ગુણજીભાઈ (ઉં.વ. 28), નિલેશ પીઠાયા (ઉં.વ. 37), અનિલ પીઠાયા (ઉં.વ. 40) અને કાલુભુરીયા (ઉં.વ. 30)નો સમાવેશ થાય છે.
