પંચમહાલ જિલ્લાના ઘોઘંબા તાલુકાના મુળા ની કાપડી ગામે દીપડાએ ગત રાત્રિના સમયે ગમાણમાં ઘૂસીને ચાર બકરાંનું મારણ કરતાં પશુપાલકોમાં ચિંતાની લાગણી ફેલાઈ છે. લલિતાબેન અર્જુનભાઈ બારીઆનાં બકરાં પર દીપડાએ હુમલો કર્યો હોવાનું જાણવા મળ્યું છે. આ ઘટના કાંટુ રાઉન્ડ ફોરેસ્ટ હેઠળ આવતા વિસ્તારમાં બની હોવાનું સામે આવ્યું છે.
પ્રાપ્ત વિગતો અનુસાર, ગત રાત્રિના સમયે દીપડાએ ગામમાં આવેલા ગમાણમાં હુમલો કરી ચાર બકરાંનો શિકાર કર્યો હતો. ઘટનાની જાણ થતાં વન વિભાગના કર્મચારીઓએ સ્થળ તપાસ કરી હતી અને તેનો રિપોર્ટ નાયબ વન સંરક્ષક, ગોધરાને સુપરત કર્યો હોવાનું જાણવા મળ્યું છે. જોકે, દીપડાની અવરજવર ગામની નજીક સુધી પહોંચતાં પશુપાલકો અને ગ્રામજનોમાં ભયનો માહોલ ઊભો થયો છે.
એક તરફ દીપડાના હુમલાની ઘટના બની છે, તો બીજી તરફ વન વિભાગના અધિકારીઓ અને કર્મચારીઓ હડતાળના કારણે ગાંધીનગર ખાતે હોવાની માહિતી સામે આવી છે. આવી પરિસ્થિતિમાં દીપડાને પકડવા માટે પાંજરું મૂકવાની કાર્યવાહી કોણ કરશે? ગામલોકોની સુરક્ષા માટે તાત્કાલિક પગલાં કોણ લેશે? અને જો દીપડો ફરી પશુઓ કે માનવીઓ પર હુમલો કરે તો તેની જવાબદારી કોની રહેશે? આવા સવાલો હાલ સ્થાનિક સ્તરે ચર્ચાઈ રહ્યા છે.
વન્યપ્રાણી રહેણાક વિસ્તારની નજીક આવીને પશુઓનો શિકાર કરે ત્યારે માત્ર સ્થળ તપાસ અને રિપોર્ટ પૂરતાં નથી; અસરગ્રસ્ત પરિવારને જરૂરી માર્ગદર્શન, જોખમનું મૂલ્યાંકન અને કાયદેસરની પ્રક્રિયા મુજબ યોગ્ય સુરક્ષાત્મક પગલાં પણ એટલાં જ જરૂરી છે.
આ સમગ્ર મામલે વન વિભાગની હડતાળને કારણે જંગલ વિસ્તારમાં દેખરેખ અને કાયદાના અમલ અંગે પણ પ્રશ્નો ઊભા થયા છે. ઘોઘંબા તાલુકાના જંગલ વિસ્તારોમાં અગાઉ ખેર અને સાગનાં લાકડાંની કાપણીની ઘટનાઓ બની હોવાની ચર્ચા રહી છે. આવી સ્થિતિમાં હડતાળ દરમિયાન જંગલમાં ગેરકાયદે વૃક્ષછેદન થાય તો તેની તપાસ અને કાર્યવાહી કોણ કરશે? વન સંપત્તિનું રક્ષણ કરવાની જવાબદારી કેવી રીતે નિભાવવામાં આવશે? તે અંગે સ્પષ્ટતા જરૂરી બની છે. જંગલની દેખરેખ અને વન્યપ્રાણીઓની સુરક્ષા જેવી આવશ્યક કામગીરી ખોરવાય નહીં તે સુનિશ્ચિત કરવું તંત્ર માટે મહત્ત્વનું છે.
મુળા ની કાપડી ગામે ચાર બકરાંના મારણની ઘટના બાદ હવે વન વિભાગ દ્વારા દીપડાની અવરજવરનું નિરીક્ષણ કરી, જરૂરિયાત મુજબ પાંજરું મૂકવા સહિતનાં યોગ્ય પગલાં લેવામાં આવે તેવી સ્થાનિક સ્તરે અપેક્ષા છે. સાથે જ અસરગ્રસ્ત પશુપાલકને વળતર અંગેની લાગુ પડતી જોગવાઈઓની માહિતી અને જરૂરી સહાય મળે તે પણ મહત્ત્વનું છે.
વન વિભાગની હડતાળ હોય કે અન્ય કોઈ વહીવટી પરિસ્થિતિ, જંગલની સુરક્ષા, વન્યપ્રાણીથી માનવજીવનનું રક્ષણ અને ગ્રામજનોની સલામતી જેવા પ્રશ્નો અવગણાય નહીં તે જરૂરી છે. હવે જોવાનું એ રહેશે કે સંબંધિત વન વિભાગ અને ઉચ્ચ અધિકારીઓ આ ઘટનાને કેટલી ગંભીરતાથી લે છે અને ગ્રામજનોની સુરક્ષા માટે ક્યારે અસરકારક પગલાં ભરે છે.
બાળકોને સાચવે કે બકરાંને, લલિતાબેન સામે જીવનનિર્વાહનો મોટો સંકટ!
ઘોઘંબાના મુળા ની કાપડી ગામે દીપડાના હુમલામાં ચાર બકરાં ગુમાવનાર લલિતાબેન અર્જુનભાઈ બારીઆ માટે આ ઘટના માત્ર પશુઓના મારણ પૂરતી નથી, પરંતુ પરિવારના જીવનનિર્વાહ સામે ઊભું થયેલું મોટું સંકટ છે. પોતાના નાના બાળકોને કાંખમાં લઈને પરિવારનું ગુજરાન ચલાવવા માટે લલિતાબેન બકરાં ઉછેરતાં હતાં, પરંતુ દીપડાના હુમલાએ તેમની આજીવિકાને મોટો ફટકો પહોંચાડ્યો છે.
હવે લલિતાબેન સામે એક તરફ નાના બાળકોની સુરક્ષાની ચિંતા છે, તો બીજી તરફ બાકીનાં પશુઓને બચાવવાની મથામણ છે. ગમાણમાં ફરી દીપડો આવી ચઢશે તો શું થશે? બાળકોને સાચવવા કે બકરાંની રખેવાળી કરવી? અને આવી કપરી પરિસ્થિતિમાં પોતાના પરિવારની સુરક્ષા કેવી રીતે કરવી? આવા અનેક સવાલો વચ્ચે પરિવાર ભય અને ચિંતામાં મુકાયો છે.
દીપડાએ એક વખત પશુઓનો શિકાર કર્યો હોવાથી તે ફરી હુમલો કરશે એવી દહેશત ગ્રામજનોમાં ફેલાઈ છે. ત્યારે વન વિભાગ દ્વારા તાત્કાલિક તકેદારીનાં પગલાં લઈ, દીપડાની અવરજવર પર નજર રાખી અને જરૂરી સુરક્ષા વ્યવસ્થા ઊભી કરી લલિતાબેન સહિત ગામલોકોને ભયમુક્ત કરવામાં આવે તે અત્યંત જરૂરી છે.
ગરીબ પરિવારના જીવનનિર્વાહનો આધાર બનેલાં પશુઓ પણ સુરક્ષિત ન હોય અને નાના બાળકોની સલામતીની ચિંતા સતાવતી હોય, ત્યારે આ પરિવારને હાશકારો કોણ અપાવશે?
