કાજર બારીયા (છોટાઉદેપુર)
છોટાઉદેપુર નગરપાલિકાના રાજકારણમાં એકાએક મોટો ભૂકંપ આવ્યો છે. અહી સત્તાધારી પક્ષ ભાજપમાં લાંબા સમયથી ચાલતો આંતરિક વિખવાદ હવે ખુલીને સામે આવી ગયો છે. તાજેતરમાં જ નગરપાલિકાના નવા પ્રમુખ તરીકે રજનીબેન રાઠવાની સત્તાવાર વરણી કરવામાં આવી હતી. પરંતુ આ નિમણૂકના માત્ર ૩ જ દિવસમાં ભાજપમાં અસંતોષનો જ્વાળામુખી ફાટી નીકળતા અનેક તર્કવિતર્કો સર્જાયા છે.
વિકાસના કામો અને વહીવટી નિર્ણયોને લઈને ૧૭ સભ્યોએ એકજૂથ થઈને ચીફ ઓફિસરને એક લેખિત પત્ર સોંપ્યો છે. આ પત્રમાં શહેરના વિકાસ અને કામગીરીને લગતા મુખ્યત્વે ૫ મુદ્દાઓ પર રજૂઆત કરવામાં આવી છે. આ પત્રમાં સૌથી મોટી માંગ એ કરવામાં આવી છે કે, બહુમતી સભ્યોની પૂર્વ મંજૂરી લીધા વિના કોઈપણ પ્રકારના બિલ મંજૂર કરવામાં ન આવે. આ ઘટનાએ સ્થાનિક રાજકારણમાં ભારે ગરમાવો લાવી દીધો છે.
આ ૧૭ સભ્યોના જૂથમાં પક્ષના જ દિગ્ગજ નેતાઓ સામેલ છે, જે શાસક પક્ષ માટે ચિંતાનો વિષય છે. આ બળવાખોર જૂથમાં નગરપાલિકાના વર્તમાન ઉપપ્રમુખ પરવેઝ મકરાણી અને કારોબારી ચેરમેન અલ્પા શાહનો પણ સીધો સમાવેશ થાય છે. ચીફ ઓફિસરને સોંપવામાં આવેલા આ પત્રમાં જે ૧૭ સભ્યોએ સહી કરી છે, તેમનું રાજકીય બેકગ્રાઉન્ડ પણ જાણવા જેવું છે. જેના પરથી આખી રાજકીય રમતનો ખ્યાલ આવે છે. આ જૂથમાં ભાજપના પોતાના મેન્ડેટ પર ચૂંટાયેલા ૬ સભ્યો છે. આ ઉપરાંત અન્ય પક્ષોમાંથી ભાજપમાં જોડાયેલા ૧૦ સભ્યો અને કોંગ્રેસના ૧ સભ્યનો પણ આમાં સમાવેશ થાય છે.
આમ, અલગ અલગ વિચારધારા ધરાવતા સભ્યો નવા પ્રમુખની સામે એકસાથે મેદાને પડ્યા છે. જોકે, સૌથી મોટું આશ્ચર્ય એ વાતનું છે કે આટલો મોટો લેખિત વિરોધ નોંધાવ્યા પછી પણ આ ૧૭ સભ્યોમાંથી એકપણ નેતા કેમેરા સામે ખુલીને કંઈપણ બોલવા માટે તૈયાર નથી. આ સમગ્ર વિવાદ અને બળવા અંગે નગરપાલિકાના નવા પ્રમુખ રજનીબેન રાઠવાએ પોતાનો બચાવ કરતા સ્પષ્ટતા કરી છે. તેમણે પાલિકામાં કોઈપણ પ્રકારનો જૂથવાદ હોવાનો સદંતર ઇનકાર કર્યો છે.
તેમણે મીડિયા સમક્ષ જણાવ્યું છે કે, નગરપાલિકામાં વિકાસનાં તમામ કામો સરકારની ગાઇડલાઇન અને નિયમો મુજબ જ કરવામાં આવશે. આ માટે તેમને બોર્ડના તમામ સભ્યોના પૂરતા સહકારની અપેક્ષા છે. બીજી તરફ, આ આંતરિક ખેંચતાણ અંગે પૂર્વ રેલવે રાજ્યમંત્રી નારણ રાઠવાએ પણ પોતાની કડક પ્રતિક્રિયા આપી છે. તેમણે ૧૭ સભ્યો દ્વારા અલગ જૂથ બનાવવાના આ પગલાંને પક્ષની શિસ્ત વિરુદ્ધ ગણાવીને નેતાગીરી સામે ગંભીર સવાલો ઉઠાવ્યા છે.
હવે સ્થાનિક નાગરિકો અને રાજકીય વિશ્લેષકોમાં એ વાતની ભારે ચર્ચા જાગી છે કે, આ સમગ્ર મામલો ખરેખર શું છે. પ્રમુખની વરણીના માત્ર ૩ દિવસમાં જ સભ્યોનો આવો વિરોધ અનેક શંકાઓ ઊભી કરે છે. શું આ માત્ર એક વહીવટી પ્રક્રિયા અને બિલ મંજૂરી પૂરતો સીમિત મુદ્દો છે, કે પછી નગરપાલિકામાં સત્તા અને મલાઈદાર હોદ્દાઓ મેળવવા માટે ચાલી રહેલી કોઈ મોટી આંતરિક ખેંચતાણનો એક ભાગ છે? આવનારા દિવસોમાં જ ખબર પડશે કે ભાજપ હાઈકમાન્ડ આ ડેમેજ કંટ્રોલ કેવી રીતે કરે છે અને વિરોધીઓને કેવી રીતે મનાવે છે. પરંતુ હાલ પૂરતું તો છોટાઉદેપુર નગરપાલિકાનું રાજકારણ ચરમસીમાએ પહોંચી ગયું છે.
