અવધ એક્સપ્રેસ | વડોદરા
લોહપુરુષ ભારત રત્ન સરદાર વલ્લભભાઈ પટેલની જન્મજયંતી નિમિત્તે આજે વડોદરાના નવલખી ગ્રાઉન્ડ ખાતે ‘રાષ્ટ્રીય એકતા દિવસ-૨૦૨૬’ અને ‘રન ફોર યુનિટી’ કાર્યક્રમનું ભવ્ય આયોજન કરવામાં આવ્યું હતું. મુખ્યમંત્રી ભૂપેન્દ્ર પટેલની ગરીમામય અને પ્રેરક ઉપસ્થિતિમાં યોજાયેલા આ રાષ્ટ્રીય પર્વની ઉજવણીમાં દેશભક્તિ અને રાષ્ટ્રભાવનાનો અદ્ભુત માહોલ જોવા મળ્યો હતો.
સવારે ૭ કલાકે નવલખી ગ્રાઉન્ડ ખાતે પધારેલા મુખ્યમંત્રીનું પોલીસ બેન્ડની સુરાવલીઓ સાથે ગાર્ડ ઓફ ઓનર આપીને ભવ્ય સ્વાગત કરવામાં આવ્યું હતું. ત્યારબાદ મુખ્યમંત્રીએ ભારત રત્ન સરદાર વલ્લભભાઈ પટેલની પ્રતિમાને આદરપૂર્વક પુષ્પાંજલિ અર્પણ કરી હતી અને રાષ્ટ્રગાન બાદ વડોદરા શહેરના પોલીસ કમિશનર નરસિમ્હા કોમાર દ્વારા ઉપસ્થિત સૌને રાષ્ટ્રીય એકતાના શપથ લેવડાવવામાં આવ્યા હતા.
મુખ્યમંત્રી ભૂપેન્દ્ર પટેલના હસ્તે ‘રન ફોર યુનિટી’ને ફ્લેગ ઓફ આપીને પ્રસ્થાન કરાવવામાં આવ્યું હતું. માત્ર પ્રસ્થાન જ નહીં, પરંતુ મુખ્યમંત્રીશ્રી સ્વયં ઉત્સાહભેર આ ‘રન ફોર યુનિટી’ કાર્યક્રમમાં જોડાયા હતા અને સહભાગી બન્યા હતા. તેમની આ પ્રેરણાદાયી ઉપસ્થિતિએ ઉપસ્થિત તમામ નાગરિકો અને યુવાનોમાં ભારે જોશ અને ઉત્સાહ ભરી દીધો હતો.
વિશેષરૂપે, યુવાનોએ “Say No To Drugs, Say Yes To Life” (ડ્રગ્સને ના કહો, જીવનને હા કહો) ના નારાવાળા અને નશામુક્તિના સંદેશ આપતા પ્લે કાર્ડ્સ સાથે જોડાઈને સમાજમાં સ્વાસ્થ્ય અને જાગૃતિનો ઉત્તમ સંદેશ ફેલાવ્યો હતો.
‘એક ભારત – શ્રેષ્ઠ ભારત’ની થીમ પર યોજાયેલા આ કાર્યક્રમમાં વિધાનસભાના મુખ્ય દંડક બાળકૃષ્ણ શુક્લ, મેયર ગીતાબેન મકવાણા, વડોદરા શહેરના ધારાસભ્યઓ, જન પ્રતિનિધિઓ સહિતના પદાધિકારીઓ, કલેક્ટર અનિલ ધામેલિયા સહિત જિલ્લા વહીવટી તંત્રના અધિકારીઓ, પોલીસ અધિકારીઓ અને સ્ટાફ, અગ્રણીઓ, વિવિધ એન.જી.ઓ.ના પ્રતિનિધિઓ, યોગ સેવકો તથા કોલેજના વિદ્યાર્થીઓએ રાષ્ટ્રીય અખંડિતતા અને દ્રઢસંકલ્પતાની ભાવના સાથે ઉત્સાહભેર સહભાગિતા નોંધાવી હતી.
