અવધ એક્સપ્રેસ | વડોદરા
જીવનના વિવિધ ક્ષેત્રોનું પ્રતિનિધિત્વ કરતી ત્રણ મહિલાઓ સહિત છત્તીસગઢના ૧૭ સભ્યોના પ્રતિનિધિમંડળે વડોદરાના ભવ્ય લક્ષ્મી વિલાસ પેલેસ અને મહારાજા ફતેહસિંહ મ્યુઝિયમની મુલાકાત સાથે તેમના વડોદરા પ્રવાસનું સમાપન કર્યું હતું.
ત્યારબાદ આ ટીમ સરદાર વલ્લભભાઈ પટેલની જન્મજયંતિ નિમિત્તે ૩૧ ઓક્ટોબરે યોજાનારી યુનિટી માર્ચ અને ‘રાષ્ટ્રીય એકતા દિવસ’ની ઉજવણીમાં ભાગ લેવા કેવડિયા સ્થિત સ્ટેચ્યુ ઓફ યુનિટી જવા રવાના થઈ હતી.
ગુજરાતની તેમની આ પ્રથમ મુલાકાત દરમિયાન, પ્રતિનિધિમંડળે પોતાના પ્રવાસની શરૂઆત પાવાગઢ સ્થિત પવિત્ર માં કાલી મંદિર અને યુનેસ્કો (UNESCO) વર્લ્ડ હેરિટેજ સાઇટ ચાંપાનેરથી કરી હતી. બીજા દિવસે આ ટીમે કરમસદ સ્થિત સરદાર પટેલ સ્મારકની મુલાકાત લીધી હતી, જ્યાં સભ્યોએ ભારતના અખંડિતતાના શિલ્પી સરદાર પટેલના જીવન, તેમના વારસા અને રાષ્ટ્રીય એકતામાં તેમના યોગદાન વિશે માહિતી મેળવી હતી. આ પ્રતિનિધિમંડળે આણંદ સ્થિત અમૂલની પણ મુલાકાત લીધી હતી, જ્યાં તેમણે ચોકલેટ મેન્યુફેક્ચરિંગ પ્લાન્ટની મુલાકાત સાથે ડેરી સહકારી ચળવળ, દૂધ પ્રોસેસિંગ અને માર્કેટિંગ વિશે ઊંડાણપૂર્વક સમજ મેળવી હતી.
છેલ્લા દિવસે પ્રતિનિધિમંડળે ભવ્ય લક્ષ્મી વિલાસ પેલેસની મુલાકાત લીધી હતી અને પેલેસના ભવ્ય સ્થાપત્યની પ્રશંસા કરી હતી. તેમણે મ્યુઝિયમમાં ચિત્રો, પોટ્રેટ, શિલ્પો અને કળાકૃતિઓના સંગ્રહને નિહાળીને શહેરના સમૃદ્ધ સાંસ્કૃતિક વારસાને બિરદાવ્યો હતો.
આ પ્રવાસે ટીમને ગુજરાતના આધ્યાત્મિક વારસા, સ્થાપત્યની ભવ્યતા, સાંસ્કૃતિક સમૃદ્ધિ અને સહકારી ક્ષેત્ર આધારિત વિકાસનો અનુભવ કરવાની તક પૂરી પાડી હતી. રાજ્યના વારસા અને વૈવિધ્યથી પ્રભાવિત થઈને, સભ્યોએ પોતાના અનુભવની પ્રશંસા કરી હતી અને ફરીથી ગુજરાતની મુલાકાત લેવાની ઈચ્છા વ્યક્ત કરી હતી.
