(મયુર જાની)
પંચમહાલ જિલ્લામાં હવામાન વિભાગ દ્વારા ભારે વરસાદની આગાહી વચ્ચે આખરે ગોધરા શહેરમાં મેઘરાજાએ ધમાકેદાર એન્ટ્રી કરી છે. વહેલી સવારથી જ ભારે ઉકળાટ, બફારો અને અસહ્ય ગરમીના કારણે શહેરીજનો ભારે પરેશાન બન્યા હતા. બપોર બાદ અચાનક વાતાવરણમાં પલટો આવ્યો અને કાળા ડિબાંગ વાદળો છવાઈ જતાં શહેરમાં વીજળીના કડાકા-ભડાકા સાથે ધોધમાર વરસાદ શરૂ થયો.
ગોધરા શહેર ઉપરાંત જિલ્લાના અનેક ગ્રામ્ય વિસ્તારોમાં પણ સારો વરસાદ નોંધાયો હતો. વરસાદ શરૂ થતાં રસ્તાઓ પર પાણી વહેવા લાગ્યું અને ગરમીથી ત્રસ્ત લોકોને મોટી રાહત મળી. ઠંડા પવને વાતાવરણને ખુશનુમા બનાવી દીધું હતું, જેના કારણે લોકોમાં પણ રાહત અને આનંદ જોવા મળ્યો.
હવામાન વિભાગે અગાઉ જ પંચમહાલ જિલ્લામાં ભારે વરસાદની શક્યતા વ્યક્ત કરી હતી. આગાહી વચ્ચે પડેલા આ વરસાદે ખેડૂતોમાં નવી આશા જગાવી છે. છેલ્લા કેટલાક દિવસોથી વરસાદની રાહ જોઈ રહેલા ખેડૂતોમાં ખુશીનો માહોલ જોવા મળી રહ્યો છે. વરસાદથી વાવેતર કરેલા પાકને પણ ફાયદો થવાની શક્યતા છે.
વરસાદ પડતાં શહેરના કેટલાક નીચાણવાળા વિસ્તારોમાં પાણી ભરાવાની સ્થિતિ પણ સર્જાઈ હતી, જ્યારે વાહનચાલકોએ ધીમી ગતિએ વાહન ચલાવી સલામત રીતે મુસાફરી કરી હતી. વરસાદને કારણે વાતાવરણમાં ઠંડક પ્રસરી ગઈ અને લોકો ગરમી તથા બફારામાંથી રાહત અનુભવતા જોવા મળ્યા.
હવામાન વિભાગે આગામી કલાકોમાં પણ જિલ્લામાં વરસાદી માહોલ યથાવત રહેવાની શક્યતા વ્યક્ત કરી છે. વહીવટી તંત્ર દ્વારા પણ નાગરિકોને સાવચેત રહેવા, વીજળીના કડાકા દરમિયાન ખુલ્લા સ્થળોએ ન રહેવા અને નદી-નાળાઓ પાસે ન જવા અપીલ કરવામાં આવી છે.
