ગત વર્ષે વરસાદને કારણે પરિક્રમા રદ થતાં આ વર્ષે મોટી સંખ્યામાં ભાવિકો ઉમટવાની શક્યતા : જંગલના કુદરતી જળસ્ત્રોતો સૂકાતાં પીવાના પાણીની વ્યવસ્થા મોટો પડકાર
જૂનાગઢ : ગિરનારની પાવન તળેટી અને ગીચ જંગલ વિસ્તારમાં યોજાતી વિશ્વવિખ્યાત 36 કિલોમીટરની ગિરનાર લીલી પરિક્રમાને હવે ગણતરીના દિવસો બાકી રહ્યા છે, ત્યારે લાખો શ્રદ્ધાળુઓની સુરક્ષા અને સુવિધાઓને લઈને વહીવટી તંત્ર દ્વારા તૈયારીઓને આખરી ઓપ આપવાની કવાયત હાથ ધરવામાં આવી છે. પરિક્રમા રૂટની વ્યવસ્થાઓની સમીક્ષા કરવા જિલ્લા કલેક્ટર યોગેશ ચૌધરી, સાંસદ રાજેશ ચુડાસમા, સ્થાનિક ધારાસભ્ય, પોલીસ અને વન વિભાગના અધિકારીઓ તેમજ સાધુ-સંતોએ સ્થળ નિરીક્ષણ કર્યું હતું.
આ વર્ષે ઓછા વરસાદના કારણે ગિરનારના જંગલ વિસ્તારમાં આવેલા કુદરતી જળસ્ત્રોતો સૂકાઈ ગયા હોવાથી પરિક્રમાર્થીઓ માટે પીવાના પાણીની વ્યવસ્થા કરવી તંત્ર સામે મોટો પડકાર બન્યો છે. બીજી તરફ, ગત વર્ષે ભારે વરસાદને કારણે પરિક્રમા રદ કરવામાં આવી હોવાથી આ વર્ષે ભાવિકોની સંખ્યામાં વધારો થવાની શક્યતા છે. આ પરિસ્થિતિને ધ્યાનમાં રાખીને તંત્ર દ્વારા આગોતરું આયોજન શરૂ કરવામાં આવ્યું છે.
નિરીક્ષણ દરમિયાન ઇટવા ચેકપોસ્ટથી જીણાબાવાની મઢી સુધીના માર્ગની સ્થિતિ તપાસવામાં આવી હતી. ઉપરાંત ભવનાથ તળેટીથી બોરદેવી સુધીના સમગ્ર પરિક્રમા રૂટનું પણ નિરીક્ષણ કરાયું હતું. રસ્તાઓની સ્થિતિ, શ્રદ્ધાળુઓની અવરજવર, ભીડ નિયંત્રણ, પીવાના પાણીની વ્યવસ્થા અને કટોકટીના સમયે ઉપલબ્ધ કરાવવાની સુવિધાઓ અંગે અધિકારીઓએ સ્થળ પર જ સમીક્ષા કરી હતી. જ્યાં જરૂરી જણાયું ત્યાં સંબંધિત વિભાગોને જરૂરી સૂચનાઓ આપવામાં આવી હતી.
પરિક્રમામાં આ વખતે સૌથી મોટો પ્રશ્ન પીવાના પાણીનો છે. જંગલ વિસ્તારના કુદરતી જળસ્ત્રોતો સૂકાઈ જતાં તંત્ર દ્વારા વૈકલ્પિક વ્યવસ્થા ઊભી કરવામાં આવી રહી છે. અત્યાર સુધીમાં જંગલ વિસ્તારમાં પાંચ નવા બોરિંગ કરવામાં આવ્યા છે, જેમાંથી ચાર બોરિંગમાં સફળતાપૂર્વક પાણી મળ્યું છે. જ્યારે વધુ બોરિંગ કરવાની કામગીરી પણ ચાલુ રાખવામાં આવી છે. પરિક્રમા દરમિયાન મોટી સંખ્યામાં ભાવિકો જંગલના માર્ગે પસાર થવાના હોવાથી પાણીની સતત ઉપલબ્ધતા જાળવવા તંત્ર દ્વારા પ્રયાસો હાથ ધરવામાં આવ્યા છે.
દર વર્ષે કારતક સુદ અગિયારસથી પૂનમ સુધી યોજાતી ગિરનારની લીલી પરિક્રમા ધાર્મિક આસ્થા અને પરંપરાનું મહાપર્વ ગણાય છે. દેશભરમાંથી મોટી સંખ્યામાં શ્રદ્ધાળુઓ જૂનાગઢ આવી પરિક્રમામાં જોડાય છે. જોકે, ગત વર્ષે ભારે વરસાદના કારણે પરિક્રમા માર્ગ પર પાણી ભરાવા અને રસ્તાઓની સ્થિતિ બગડતાં પરિક્રમા મોકૂફ રાખવાનો નિર્ણય લેવાયો હતો. આથી આ વર્ષે ભાવિકોમાં વિશેષ ઉત્સાહ જોવા મળી રહ્યો છે.
બીજી તરફ, પરિક્રમાના કઠિન જંગલ માર્ગ અને પાણીની અછતને ધ્યાનમાં રાખીને સાધુ-સંતોએ ભાવિકોને સાવચેતી રાખવા અપીલ કરી છે. ખાસ કરીને વૃદ્ધો અને નાના બાળકોને આ વર્ષે પરિક્રમા ટાળવાની સલાહ આપવામાં આવી છે. કમંડલકુંડના મહંત મહેશગીરી બાપુ અને મહામંડલેશ્વર મહેન્દ્રાનંદ ગિરી બાપુએ પરિક્રમાર્થીઓની સુરક્ષા અને સુવિધાઓને પ્રાથમિકતા આપવા ભાર મૂક્યો હતો. સાંસદ રાજેશ ચુડાસમાએ પણ શ્રદ્ધાળુઓને વહીવટી તંત્રની સૂચનાઓનું પાલન કરવા અને વ્યવસ્થા જાળવવામાં સહકાર આપવા અનુરોધ કર્યો હતો.
વહીવટી તંત્ર, પોલીસ, વન વિભાગ, મહાનગરપાલિકા અને સાધુ-સંતો દ્વારા સંયુક્ત રીતે સમગ્ર આયોજનની સમીક્ષા કરવામાં આવી છે. આગામી 15 દિવસમાં પરિક્રમા સંબંધિત તમામ જરૂરી વ્યવસ્થાઓ પૂર્ણ કરવાનો લક્ષ્યાંક રાખવામાં આવ્યો છે. હવે પરિક્રમાર્થીઓને પીવાનું પાણી, સુરક્ષિત માર્ગ અને જરૂરી સુવિધાઓ સમયસર મળી રહે તે દિશામાં તંત્રની તૈયારીઓ પર સૌની નજર મંડાઈ છે.
