શ્રાવણ માસના પવિત્ર અને પાવન અવસરે બ્રાહ્મણ સમાજ, વડોદરા દ્વારા આયોજિત શ્રી શિવમહાપુરાણ કથાનો મંગલ પ્રારંભ આજે ઇસ્કોન મંદિર, ગોત્રી, વડોદરામાં ભક્તિમય વાતાવરણ વચ્ચે થયો. શ્રી ધામ વૃંદાવનવાસી કથાવાચક પરમ પૂજ્ય સદ્ગુરુદેવ શ્રી વ્રજપાલ શુક્લજી મહારાજશ્રીએ શિવ મહાપુરાણના મહિમા સાથે જીવન જીવવાની કળા, ધર્મ, જ્ઞાન અને આત્મતત્વ પર અત્યંત પ્રેરણાદાયી માર્ગદર્શન આપ્યું.
મહારાજશ્રીએ જણાવ્યું કે અઢાર મહાપુરાણોમાં આશરે ચાર લાખ શ્લોકોનો અમૂલ્ય જ્ઞાનભંડાર સમાયેલો છે. દરેક વ્યક્તિ માટે બધું વાંચવું શક્ય નથી. તેથી કથાશ્રવણ એ જ્ઞાનના સાગરનો સાર ગ્રહણ કરવાનો સહેલો અને શ્રેષ્ઠ માર્ગ છે. શ્રી શિવમહાપુરાણનું શ્રવણ માત્ર ધાર્મિક વિધિ નથી, પરંતુ જીવનને દિશા આપતું દિવ્ય સાધન છે. તેમણે કળિયુગના સ્વભાવ પર પ્રકાશ પાડતા કહ્યું કે “કળિયુગના માનવની સૌથી મોટી વિશેષતા એ છે કે તે પોતે કંઈ કરતો નથી અને બીજાને પણ કરવા દેતો નથી.” આ વૃત્તિમાંથી બહાર આવીને સદ્કર્મ, સેવા અને સત્સંગ તરફ આગળ વધવું એ જ સાચો ધર્મ છે.
જ્ઞાનના મહિમાનું વર્ણન કરતાં મહારાજશ્રીએ કહ્યું કે “જ્ઞાનથી દરિદ્ર બ્રાહ્મણ સાચા અર્થમાં ગરીબ ગણાય, કારણ કે જ્ઞાન જ સર્વોત્તમ ધન છે.” ભૌતિક સંપત્તિ ક્ષણિક છે, પરંતુ જ્ઞાન જીવનને પ્રકાશિત કરે છે અને સમાજને સમૃદ્ધ બનાવે છે.
પરોપકારના ભાવને સમજાવતા તેમણે કહ્યું કે દૂધ, દહીં, ઘી અને પાણી જેવી જીવનદાયી વસ્તુઓનું વ્યાપારીકરણ કરતાં તેને સેવા અને પરોપકારના દૃષ્ટિકોણથી જોવું એ ભારતીય સંસ્કૃતિનું મૂળ તત્વ છે.
ગૃહસ્થ આશ્રમ વિશે માર્ગદર્શન આપતાં તેમણે જણાવ્યું કે ધર્મપૂર્વક પ્રાપ્ત થયેલા ધન વિના ગૃહસ્થ જીવનની જવાબદારીઓનું સફળ નિર્વહન શક્ય નથી. અર્થ અને ધર્મનો સમન્વય જ આદર્શ ગૃહસ્થ જીવનનું લક્ષણ છે.
કથામાં બ્રહ્મર્ષિ વશિષ્ઠ અને કાગભુષુંડીના સંવાદનો ઉલ્લેખ કરતાં મહારાજશ્રીએ જણાવ્યું કે શરીર વારંવાર બદલાય છે, પરંતુ આત્મા શાશ્વત છે. જે જીવનતત્વને ઓળખે છે, તે જન્મ અને મૃત્યુની મર્યાદાઓથી પરમ સત્યનો અનુભવ કરે છે. આ જ શિવતત્વનો સાર છે.
શ્રી શિવમહાપુરાણ કથા માત્ર ધાર્મિક કથા નથી, પરંતુ તે માનવજીવનને સત્ય, કરુણા, સંયમ, ભક્તિ, વૈરાગ્ય અને આત્મજ્ઞાન તરફ દોરી જતી દિવ્ય જીવનયાત્રા છે. ભગવાન શિવનો સંદેશ સમગ્ર માનવજાતને આંતરિક શાંતિ, સમરસતા અને કલ્યાણ તરફ પ્રેરિત કરે છે.
શ્રાવણ માસ દરમિયાન યોજાનારી આ કથામાં દરરોજ મોટી સંખ્યામાં ભક્તો, સંતો, વિદ્વાનો અને શિવભક્તો ઉપસ્થિત રહી આધ્યાત્મિક જ્ઞાનનો લાભ લઈ રહ્યા છે. આયોજક બ્રાહ્મણ સમાજ, વડોદરાએ સર્વે ભાવિકોને આ દિવ્ય કથાશ્રવણમાં સહભાગી બનવા માટે હાર્દિક આમંત્રણ પાઠવ્યું છે.
“શિવકથા સાંભળવાથી માત્ર કાન પવિત્ર થતા નથી, પરંતુ જીવનનું ચિંતન પવિત્ર બને છે; અને જ્યારે જીવન પવિત્ર બને છે ત્યારે જ સમાજ અને રાષ્ટ્રનું કલ્યાણ શક્ય બને છે.”
