- માઇક્રોસોફ્ટના અનેક સર્વર અચાનક ઠપ થઈ ગયા.
- સર્વર બંધ થતાં અન્ય સર્વરો પર વધ્યો કામનો બોજ.
- ઓટોમેટિક હેલ્થ ચેક પ્રક્રિયામાં સર્જાઈ મુશ્કેલી.
- આઉટલુક, ટીમ્સ અને કોપાયલટ જેવી સેવાઓ પણ થઈ પ્રભાવિત.
માઇક્રોસોફ્ટની અનેક સેવાઓ અચાનક ખોરવાઈ જતાં દુનિયાભરના યુઝર્સને ભારે મુશ્કેલીનો સામનો કરવો પડ્યો હતો. કેટલાક યુઝર્સ પોતાના આઉટલુક એકાઉન્ટમાં લોગ-ઇન કરી શકતા ન હતા, તો કેટલાકને ઈમેલ મોકલવામાં અને નવા ઈમેલ મેળવવામાં મુશ્કેલી પડી રહી હતી. માઇક્રોસોફ્ટ 365, ટીમ્સ અને એઆઈ આસિસ્ટન્ટ કોપાયલટ જેવી સેવાઓ પણ પ્રભાવિત થઈ હતી.
શરૂઆતમાં એવું માનવામાં આવતું હતું કે સર્વર પર અચાનક વધેલા ટ્રાફિકને કારણે આ સમસ્યા સર્જાઈ હશે. જોકે, કંપનીની પ્રાથમિક તપાસમાં અલગ જ કારણ સામે આવ્યું હતું. માઇક્રોસોફ્ટના અનેક સર્વર અચાનક કામ કરવાનું બંધ કરી દેતાં અન્ય કાર્યરત સર્વરો પર વધારાનો બોજ પડ્યો હતો. જેના કારણે એક પછી એક અનેક સેવાઓમાં વિક્ષેપ સર્જાયો હતો. ચાલો જાણીએ કે આ ટેકનિકલ ખામી કેવી રીતે સર્જાઈ અને તેની અસર આટલી બધી સેવાઓ પર શા માટે જોવા મળી.
Microsoft Outage: આખરે માઇક્રોસોફ્ટમાં શું થયું હતું?
– ગુરુવારની મોડી રાત્રે માઇક્રોસોફ્ટની ઈમેલ સેવા આઉટલુક અને માઇક્રોસોફ્ટ 365માં અચાનક મુશ્કેલી શરૂ થઈ હતી. ભારત સહિત દુનિયાભરના યુઝર્સને પોતાના એકાઉન્ટમાં લોગ-ઇન કરવા, ઈમેલ મોકલવા તેમજ નવા ઈમેલ મેળવવામાં મુશ્કેલીનો સામનો કરવો પડ્યો હતો. અનેક યુઝર્સ તો પોતાનું ઈનબોક્સ પણ ખોલી શકતા ન હતા.
– આ સમસ્યાની અસર માત્ર આઉટલુક પૂરતી મર્યાદિત રહી નહોતી. માઇક્રોસોફ્ટ ટીમ્સ અને એઆઈ આસિસ્ટન્ટ કોપાયલટ પણ પ્રભાવિત થયા હતા. આ ઉપરાંત માઇક્રોસોફ્ટના સર્વર સાથે જોડાયેલી OpenAI અને Anthropicની કેટલીક સેવાઓમાં પણ મુશ્કેલી જોવા મળી હતી. ખાસ કરીને માઇક્રોસોફ્ટ 365 કનેક્ટર સાથે જોડાયેલી સુવિધાઓ પર તેની અસર પડી હતી.
સર્વર ઠપ થવાનું શું કારણ સામે આવ્યું?
– શરૂઆતમાં એવું માનવામાં આવી રહ્યું હતું કે સર્વર પર અચાનક વધેલા ટ્રાફિકને કારણે સેવાઓ ખોરવાઈ હતી. પરંતુ માઇક્રોસોફ્ટની તપાસમાં જાણવા મળ્યું કે સમસ્યા માત્ર એકસાથે મોટી સંખ્યામાં યુઝર્સ દ્વારા સેવાઓનો ઉપયોગ કરવાને કારણે સર્જાઈ નહોતી.
– કંપનીના જણાવ્યા અનુસાર, તેના ઇન્ફ્રાસ્ટ્રક્ચરના અનેક સર્વર અચાનક ઉપલબ્ધ રહેવાનું બંધ થઈ ગયા હતા. પરિણામે અન્ય કાર્યરત સર્વરો પર વધારાનો બોજ પડવા લાગ્યો હતો. આ કારણે યુઝર્સની રિક્વેસ્ટને યોગ્ય રીતે હેન્ડલ કરવામાં મુશ્કેલી સર્જાઈ અને આઉટલુક સહિતની અન્ય સેવાઓમાં કનેક્ટિવિટી એરર આવવા લાગ્યા હતા.
– માઇક્રોસોફ્ટે વધુમાં જણાવ્યું હતું કે અસરગ્રસ્ત સર્વર ઓટોમેટિક હેલ્થ ચેક પ્રક્રિયામાં નિષ્ફળ જઈ રહ્યા હતા. આ પ્રક્રિયા દ્વારા સર્વર યોગ્ય રીતે કાર્ય કરી રહ્યા છે કે નહીં તેની તપાસ કરવામાં આવે છે. કંપનીને શંકા હતી કે તાજેતરમાં હેલ્થ ચેક સાથે જોડાયેલા એક કમ્પોનન્ટમાં કરવામાં આવેલા ફેરફારને કારણે આ સમસ્યા સર્જાઈ હોઈ શકે છે. જોકે, તપાસ દરમિયાન આ બાબતની પુષ્ટિ થઈ નહોતી.
એક સર્વરની ખામીથી અન્ય સેવાઓ પર કેવી રીતે પડી અસર?
માઇક્રોસોફ્ટની ઓનલાઇન સેવાઓ મોટા સર્વર નેટવર્કના આધારે કાર્ય કરે છે. જ્યારે કોઈ યુઝર આઉટલુક ખોલે છે અથવા ઈમેલ મોકલે છે, ત્યારે તેની રિક્વેસ્ટ સર્વર સુધી પહોંચે છે. સર્વર આ રિક્વેસ્ટને પ્રોસેસ કરીને યુઝરને જરૂરી સેવા પૂરી પાડે છે.
પરંતુ જ્યારે નેટવર્કના અનેક સર્વર અચાનક કામ કરવાનું બંધ કરી દે છે, ત્યારે તેમની જવાબદારી અન્ય કાર્યરત સર્વરો પર આવી જાય છે. જેના કારણે બાકીના સર્વરો પર કામનું ભારણ વધી જાય છે.
જો આ સર્વર પણ વધેલી રિક્વેસ્ટને યોગ્ય રીતે હેન્ડલ ન કરી શકે, તો યુઝર્સને લોગ-ઇન કરવા, ઈમેલ મોકલવા અને મેળવવામાં મુશ્કેલી સર્જાય છે.
માઇક્રોસોફ્ટની તપાસમાં પણ આવી જ સ્થિતિ સામે આવી હતી. કંપનીના જણાવ્યા અનુસાર, અનેક સર્વર ઉપલબ્ધ ન રહેતાં બાકીના ઇન્ફ્રાસ્ટ્રક્ચર પર દબાણ વધ્યું હતું. અસરગ્રસ્ત સર્વરો પર એક મહત્ત્વપૂર્ણ પ્રક્રિયા પર પણ વધુ ભાર પડતાં સર્વર જવાબ આપવાનું બંધ કરી રહ્યા હતા.
Outlook Not Working Today: માઇક્રોસોફ્ટે સમસ્યા દૂર કરવા શું પગલાં લીધાં?
– સમસ્યાની જાણ થતાં જ માઇક્રોસોફ્ટે પોતાના સર્વર ઇન્ફ્રાસ્ટ્રક્ચરમાં સુધારા અને રિકવરીની કામગીરી શરૂ કરી હતી.
– કંપનીએ તાજેતરમાં કરવામાં આવેલા ફેરફારોની તપાસ કરવા માટે થોડા સમય માટે નવા ડિપ્લોયમેન્ટ અને કન્ફિગરેશન સંબંધિત ફેરફારો અટકાવી દીધા હતા.
– આ ઉપરાંત, અસરગ્રસ્ત સર્વરોને રિસ્ટાર્ટ કરવાની કામગીરી હાથ ધરવામાં આવી હતી. આઉટલુકનો કનેક્શન ટ્રાફિક અન્ય કાર્યરત સર્વર અને વૈકલ્પિક નેટવર્ક માર્ગો તરફ વાળવામાં આવ્યો હતો. આ પગલાંનો મુખ્ય હેતુ અસરગ્રસ્ત સર્વરો પરનું ભારણ ઘટાડીને યુઝર્સને ફરીથી સેવાઓ સાથે જોડવાનો હતો.
– કેટલાક અસરગ્રસ્ત સર્વરને ફરીથી કાર્યરત કર્યા બાદ તેમની સ્થિરતાની પણ તપાસ કરવામાં આવી હતી. શરૂઆતમાં કેટલાક વિસ્તારોમાં સેવાઓ આંશિક રીતે પુનઃસ્થાપિત થઈ હતી. જોકે, તમામ સેવાઓ સંપૂર્ણપણે સામાન્ય બનાવવા માટે અસરગ્રસ્ત ઇન્ફ્રાસ્ટ્રક્ચરની ખામીઓ દૂર કરવી જરૂરી હતી. ભારતમાં પણ આઉટલુક સેવાને લઈને મુશ્કેલી યથાવત હોવાની જાણકારી સામે આવી હતી.
માઇક્રોસોફ્ટમાં આવી સમસ્યા પહેલીવાર નથી સર્જાઈ
માઇક્રોસોફ્ટના સર્વર અથવા ક્લાઉડ ઇન્ફ્રાસ્ટ્રક્ચરમાં ખામી સર્જાવાની આ પહેલી ઘટના નથી. અગાઉ પણ આવી ટેકનિકલ સમસ્યાઓના કારણે દુનિયાભરમાં મોટા પાયે અસર જોવા મળી ચૂકી છે.
જુલાઈ 2024માં દુનિયાભરના અનેક વિન્ડોઝ યુઝર્સને બ્લુ સ્ક્રીન ઓફ ડેથ (BSOD)ની સમસ્યાનો સામનો કરવો પડ્યો હતો. અનેક કમ્પ્યુટર અચાનક બંધ થઈ જતાં હતાં અથવા વારંવાર રિસ્ટાર્ટ થઈ રહ્યાં હતાં. આ ઘટનાનું મુખ્ય કારણ સાયબર સિક્યોરિટી કંપની ક્રાઉડસ્ટ્રાઇકના એક અપડેટને માનવામાં આવ્યું હતું.
આવી જ રીતે જુલાઈ 2024માં માઇક્રોસોફ્ટ એઝ્યોર સાથે જોડાયેલી ટેકનિકલ સમસ્યાની અસર એરલાઇન્સના આંતરિક નેટવર્ક અને અનેક કેબ સર્વિસની કામગીરી પર પણ પડી હતી.
આ ઘટનાઓ પરથી સ્પષ્ટ થાય છે કે આજના સમયમાં મોટી ઓનલાઇન સેવાઓ ક્લાઉડ અને સર્વર ઇન્ફ્રાસ્ટ્રક્ચર પર નિર્ભર છે. આવી સ્થિતિમાં કોઈ એક મોટા સર્વર નેટવર્કમાં ટેકનિકલ ખામી સર્જાય તો તેની અસર માત્ર એક કંપની પૂરતી મર્યાદિત રહેતી નથી, પરંતુ અનેક અન્ય કંપનીઓ, સેવાઓ અને વ્યવસાયોની કામગીરી પણ ખોરવાઈ શકે છે.
