ફેસબુક અને ઇન્સ્ટાગ્રામ પર વાર્ષિક રિચાર્જના નામે ફેલાઈ રહ્યું છે સ્કેમનું નેટવર્ક, અજાણી લિંક પર ક્લિક કરવું પડી શકે ભારે!
આજના ડિજિટલ યુગમાં મોબાઇલ રિચાર્જ દરેક વ્યક્તિની જરૂરિયાત બની ગયો છે. ત્યારે માત્ર ₹૩૯૯માં આખા વર્ષનું મોબાઇલ રિચાર્જ આપવાની લાલચ આપતી જાહેરાતો સોશિયલ મીડિયા પર ઝડપથી વાયરલ થઈ રહી છે. ફેસબુક અને ઇન્સ્ટાગ્રામ પર આકર્ષક પોસ્ટ અને જાહેરાતો દ્વારા લોકોને સસ્તા રિચાર્જની લાલચ આપવામાં આવી રહી છે. જો તમારા મોબાઇલમાં પણ આવી કોઈ ઓફર જોવા મળે તો ઉતાવળમાં વિશ્વાસ કરતા પહેલાં સાવધાન થઈ જજો!
સાયબર ઠગો દ્વારા લોકોને આકર્ષવા માટે જાણીતી ટેલિકોમ કંપનીઓના નામ અને લોગોનો ઉપયોગ કરીને નકલી ઓફરો રજૂ કરવામાં આવતી હોવાની આશંકા છે. આવી પોસ્ટમાં આપવામાં આવેલી લિંક પર ક્લિક કરવાથી યુઝર્સને નકલી વેબસાઇટ પર લઈ જવામાં આવી શકે છે, જ્યાં રિચાર્જ મેળવવાના બહાને વ્યક્તિગત માહિતી, મોબાઇલ નંબર, બેંકિંગ વિગતો, OTP અથવા UPI સંબંધિત માહિતી મેળવવાનો પ્રયાસ થઈ શકે છે.
ખાસ વાત એ છે કે શરૂઆતમાં માત્ર ₹૩૯૯ જેવી નાની રકમની ઓફર દેખાડીને લોકોનો વિશ્વાસ જીતવામાં આવે છે, પરંતુ આ લાલચ પાછળ મોટું સાયબર ફ્રોડ છુપાયેલું હોઈ શકે છે. એકવાર ઠગોના હાથમાં બેંકિંગ વિગતો આવી જાય તો ખાતામાંથી નાણાં ઉપડી જવાનું જોખમ ઊભું થઈ શકે છે.
આવી છેતરપિંડીથી બચવા શું કરશો?
- સોશિયલ મીડિયા પર મળતી અજાણી રિચાર્જ લિંક પર ક્લિક કરશો નહીં.
- ટેલિકોમ કંપનીની સત્તાવાર વેબસાઇટ કે એપ પરથી જ રિચાર્જ કરાવો.
- કોઈની સાથે OTP, UPI PIN કે બેંકિંગ પાસવર્ડ શેર કરશો નહીં.
- અસામાન્ય રીતે સસ્તી ઓફર જોઈને તરત જ પેમેન્ટ કરવાનું ટાળો.
- આવી શંકાસ્પદ જાહેરાતો અને લિંક્સથી અન્ય લોકોને પણ સાવચેત કરો.
સસ્તા રિચાર્જની લાલચમાં મહેનતની કમાણી ગુમાવશો નહીં!
યાદ રાખો, સોશિયલ મીડિયા પર દેખાતી દરેક આકર્ષક ઓફર સાચી હોતી નથી. કોઈપણ ઓફરનો લાભ લેતાં પહેલાં તેની સત્તાવાર ચકાસણી કરવી અત્યંત જરૂરી છે. જો કોઈ સાયબર છેતરપિંડીનો ભોગ બન્યા હોવ તો તાત્કાલિક સાયબર ક્રાઇમ હેલ્પલાઇન નંબર 1930 પર સંપર્ક કરો અથવા www.cybercrime.gov.in પર ફરિયાદ નોંધાવો.
