ગોધરા શહેરના બહારપુરા વિસ્તારમાં વર્ષ ૨૦૧૦થી કાર્યરત સદભાવના મિશન કલાસ દ્વારા ગૌરી વ્રતના પાવન અવસરને અનુલક્ષીને “ગૌરી વ્રત સ્પેશિયલ મહેંદી સ્પર્ધા” નું સુંદર આયોજન કરવામાં આવ્યું હતું. કાર્યક્રમનો મુખ્ય હેતુ ગૌરી વ્રતના ધાર્મિક, સાંસ્કૃતિક અને સામાજિક મહત્વ વિશે દીકરીઓને માહિતગાર કરવાનો તેમજ તેમની પ્રતિભાને પ્રોત્સાહન આપવાનો હતો.
કાર્યક્રમની શરૂઆત ગૌરી વ્રત વિશેની સંક્ષિપ્ત અને પ્રેરણાદાયી માહિતીથી કરવામાં આવી હતી. ગૌરી વ્રત હિન્દુ ધર્મનું પવિત્ર અને શ્રદ્ધાપૂર્વક મનાવવામાં આવતું વ્રત છે, જે દીકરીઓ માટે વિશેષ મહત્વ ધરાવે છે. આ વ્રત ભારતીય સંસ્કૃતિ, પરંપરા અને આધ્યાત્મિક મૂલ્યોનું પ્રતિબિંબ છે. ઉપસ્થિત તમામ દીકરીઓને ગૌરી વ્રતના ધાર્મિક મહત્ત્વ અને તેની પરંપરાઓ વિશે માર્ગદર્શન આપવામાં આવ્યું હતું.
સદભાવના મિશન કલાસ વર્ષ ૨૦૧૦થી ગરીબ, અનાથ અને મધ્યમવર્ગના ઝૂંપડપટ્ટી વિસ્તારમાં રહેતા બાળકોને સંપૂર્ણપણે મફત શિક્ષણ કોચિંગ આપીને શિક્ષણ ક્ષેત્રે સેવાકાર્ય કરી રહ્યું છે. અન્નપૂર્ણા ટ્રસ્ટ બિલ્ડિંગના બીજા માળે દ્રારકાનગર સોસાયટી ખાતે ચલાવવામાં આવતી સદભાવના મિશન કલાસમાં ૧૨૦થી વધુ બાળકો નિયમિત અભ્યાસ અર્થે આવે છે, જ્યારે અત્યાર સુધીમાં ૬૦૦૦થી વધુ વિદ્યાર્થીઓ અહીંથી શિક્ષણ મેળવી પોતાના ભવિષ્યને ઉજ્જવળ બનાવી ચૂક્યા છે.
આ સંસ્થાના સંચાલક ડૉ. સુજાત વલી ના માર્ગદર્શન હેઠળ તથા મુખ્ય શિક્ષક ઈમરાન ના સતત પ્રયત્નો અને સેવાભાવને કારણે સદભાવના મિશન કલાસ સમાજમાં શિક્ષણ અને સંસ્કારનું ઉત્તમ કાર્ય કરી રહ્યો છે. શિક્ષણની સાથે વિદ્યાર્થીઓમાં સાંસ્કૃતિક, ધાર્મિક અને નૈતિક મૂલ્યોનો વિકાસ થાય તે માટે સમયાંતરે વિવિધ સર્જનાત્મક અને પ્રેરણાત્મક કાર્યક્રમોનું પણ આયોજન કરવામાં આવે છે.
ગૌરી વ્રત સ્પેશિયલ મહેંદી સ્પર્ધામાં દીકરીઓએ ખૂબ જ ઉત્સાહ અને સર્જનાત્મકતા સાથે ભાગ લીધો હતો. વિવિધ આકર્ષક અને કલાત્મક મહેંદીની ડિઝાઇન દ્વારા તેમણે પોતાની પ્રતિભાનું સુંદર પ્રદર્શન કર્યું હતું. સ્પર્ધાના અંતે વિજેતા તેમજ ભાગ લેનાર તમામ દીકરીઓને પ્રમાણપત્ર (સર્ટિફિકેટ) અને રોકડ પુરસ્કાર આપી સન્માનિત કરવામાં આવી હતી, જેના કારણે બાળકોમાં આનંદ અને ઉત્સાહનો માહોલ સર્જાયો હતો.
આ પ્રસંગે સંચાલક ડૉ. સુજાત વલી, શિક્ષકશ્રી ઈમરાન, એસ. બી. આઈ બેંક રિટાયર્ડ અધિકારી ગીરાબેન મહેતા તથા ઉપસ્થિત વાલીઓએ ગૌરી વ્રત રાખનારી તમામ દીકરીઓને હાર્દિક અભિનંદન પાઠવ્યા હતા. તેમણે દીકરીઓને શિક્ષણની સાથે ભારતીય સંસ્કૃતિ, પરંપરા અને સારા સંસ્કારોને જીવનમાં અપનાવવા પ્રેરણા આપી હતી. સાથે જ ભવિષ્યમાં પણ આવા સામાજિક, શૈક્ષણિક અને સાંસ્કૃતિક કાર્યક્રમોમાં ઉત્સાહપૂર્વક જોડાવા માટે પ્રોત્સાહિત કર્યા હતા.
કાર્યક્રમનું સમગ્ર આયોજન સફળતાપૂર્વક પૂર્ણ થતાં વિદ્યાર્થીઓ, વાલીઓ અને ઉપસ્થિત મહેમાનોએ સદભાવના મિશન કલાસના સેવાકીય કાર્યની પ્રશંસા કરી હતી. શિક્ષણ સાથે સંસ્કાર, સામાજિક એકતા અને સર્વધર્મ સમભાવનો સંદેશ આપતી આવી પ્રવૃત્તિઓ સમાજ માટે પ્રેરણારૂપ બની રહે તેવી સૌએ શુભેચ્છા વ્યક્ત કરી હતી.
