સાવલીમાં ગણેશ વિસર્જન યાત્રા વચ્ચે ગટરનું ઢાંકણું તૂટતાં ટ્રક ફસાયો
વારંવાર બદલાતા ઢાંકણાં ફરી તૂટતાં ભારે ટ્રાફિક જામ, ઢાંકણાંની ગુણવત્તાને લઈને પાલિકા સામે સવાલો
સાવલી: સાવલીમાં ગણેશજીની વિસર્જન યાત્રા નીકળવાના સમયે જ રસ્તા પરનું ગટરનું ઢાંકણું ફરી એકવાર તૂટી પડતાં એક ટ્રક ગટરમાં ફસાઈ ગયો હતો. ટ્રક ફસાઈ જતાં રસ્તા પર વાહનોની લાંબી કતારો લાગી હતી અને ભારે ટ્રાફિક જામની સ્થિતિ સર્જાઈ હતી. ગણેશ વિસર્જન યાત્રા દરમિયાન જ આ બનાવ બનતા વાહનવ્યવહારને પણ અસર પહોંચી હતી.
સ્થાનિકોના જણાવ્યા મુજબ, સાવલીમાં આ ગટરનું ઢાંકણું અગાઉ પણ અનેક વખત તૂટી ચૂક્યું છે. ઢાંકણું તૂટી જતાં નગરપાલિકા દ્વારા વારંવાર નવું ઢાંકણું મૂકવામાં આવે છે, પરંતુ થોડા સમય બાદ ફરી ઢાંકણું તૂટી જવાની ઘટના સામે આવે છે. જેના કારણે આ સ્થળે કાયમી સમસ્યા સર્જાઈ રહી હોવાનું સ્થાનિકો જણાવી રહ્યા છે.
આ વખતે પણ ગટરનું ઢાંકણું તૂટી જતાં ટ્રક તેનો ભોગ બન્યો હતો. ટ્રક ગટરમાં ફસાઈ જતાં રસ્તો અવરોધાયો હતો અને વાહનચાલકોને લાંબા સમય સુધી ટ્રાફિક જામનો સામનો કરવો પડ્યો હતો. ખાસ કરીને વિસર્જન યાત્રાના સમયે રસ્તા પર મોટી સંખ્યામાં લોકો અને વાહનોની અવરજવર હોવાથી સ્થિતિ વધુ મુશ્કેલ બની હતી.
વારંવાર ઢાંકણું તૂટે છે તો સમસ્યા ક્યાં છે?
સ્થાનિકોમાં હવે સવાલ ઉઠી રહ્યા છે કે જો એક જ સ્થળે વારંવાર ગટરનું ઢાંકણું તૂટી જાય છે અને નગરપાલિકા દ્વારા વારંવાર ઢાંકણું બદલવામાં આવે છે, તો તેની ગુણવત્તા અને મજબૂતી અંગે યોગ્ય તપાસ કરવામાં આવે છે કે નહીં?
સ્થાનિકોનું કહેવું છે કે માત્ર ઢાંકણું બદલી નાખવાથી સમસ્યાનું કાયમી નિરાકરણ આવતું નથી. ઢાંકણું વારંવાર કેમ તૂટી રહ્યું છે તેની તપાસ કરી યોગ્ય ગુણવત્તાવાળું અને વાહનોનો ભાર સહન કરી શકે તેવું ઢાંકણું મૂકવામાં આવે તેવી માંગ ઉઠી રહી છે.
હવે જોવાનું એ રહ્યું કે વારંવાર સર્જાતી આ સમસ્યાને લઈને નગરપાલિકા દ્વારા કાયમી ઉકેલ માટે શું કાર્યવાહી કરવામાં આવે છે.
