ઘોઘંબા તાલુકાની મોટાભાગની ગ્રામ પંચાયતોમાં નિયમિત સામાન્ય સભા તથા ગ્રામસભા યોજાતી ન હોવાની લોકફરિયાદો ઉઠતા ગ્રામ પંચાયતના વહીવટ સામે ગંભીર સવાલો ઉભા થયા છે. ચૂંટાયેલા સભ્યો અને ગ્રામજનોને વિશ્વાસમાં લીધા વિના વહીવટી નિર્ણયો લેવાતા હોવાના આક્ષેપો વચ્ચે તાલુકાના પંચાયતી રાજના કારભાર સામે લોકોમાં રોષ જોવા મળી રહ્યો છે.
ગ્રામજનોના જણાવ્યા મુજબ, કેટલીક ગ્રામ પંચાયતોમાં સરપંચ અને તલાટી કમ મંત્રી વચ્ચેના કથિત મેળાપીપણાથી એકહથ્થું વહીવટ ચાલી રહ્યો હોવાની ચર્ચા છે. પંચાયતના ચૂંટાયેલા સભ્યોના અભિપ્રાય લેવામાં આવતા નથી અને સામાન્ય સભા કે ગ્રામસભા બોલાવવામાં ન આવતી હોવાના કારણે ગામના પ્રશ્નો રજૂ કરવા માટેનું લોકશાહી મંચ જ નિષ્ક્રિય બની રહ્યું હોવાનો આક્ષેપ કરવામાં આવી રહ્યો છે.
ગ્રામ પંચાયતના સભ્યોને ગામના વિકાસ અને વહીવટી બાબતોમાં પોતાનો મત રજૂ કરવાની તક મળવી જોઈએ, પરંતુ સામાન્ય સભા જ ન મળે તો સભ્યો પોતાની રજૂઆત કરે ક્યાં? એવો સવાલ ગ્રામજનો દ્વારા ઉઠાવવામાં આવી રહ્યો છે. બીજી તરફ, ગ્રામસભા ન યોજાય તો ગામના રસ્તા, પાણી, ગટર, લાઇટ, આવાસ સહિતના વિવિધ પ્રશ્નો અંગે ગ્રામજનો સીધી રીતે ચર્ચા અને રજૂઆત કરી શકે તેવી વ્યવસ્થા પણ અસરગ્રસ્ત બને છે.
સામાન્ય સભા અને ગ્રામસભાની કાર્યવાહી અંગે પારદર્શિતા ન રહેતી હોવાના આક્ષેપો સાથે વિવિધ વિકાસકામોમાં પણ ગેરરીતિ થતી હોવાની લોકબૂમ ઉઠી રહી છે. જોકે આ આક્ષેપોની સત્તાવાર તપાસ કે પુષ્ટિ થવી હજુ બાકી છે. લોકોમાં સવાલ એ છે કે જો પંચાયતની બેઠકો જ નિયમિત રીતે ન મળે તો વિકાસકામોના નિર્ણયો કેવી રીતે લેવાય છે? ખર્ચ અને કામોની ચર્ચા ક્યાં થાય છે? અને ગ્રામજનોને હિસાબ કોણ આપે છે?
આ સમગ્ર મામલે સ્થાનિક સ્તરે રજૂઆતો છતાં યોગ્ય કાર્યવાહી ન થતી હોવાનો પણ ગ્રામજનોનો આક્ષેપ છે. જિલ્લા કક્ષાના અધિકારીઓ સુધી ફરિયાદો પહોંચતી હોવા છતાં જો સમસ્યાનો ઉકેલ ન આવે તો પંચાયતી રાજની વ્યવસ્થામાં સામાન્ય માણસે ન્યાય માટે દરવાજો ખખડાવવો ક્યાં? એવો આક્રોશ ગ્રામજનોમાં જોવા મળી રહ્યો છે.
હવે ઘોઘંબા તાલુકાની ગ્રામ પંચાયતોમાં સામાન્ય સભા અને ગ્રામસભા નિયમિત રીતે યોજાય છે કે નહીં, તેની તટસ્થ તપાસ કરવામાં આવે અને પંચાયતની બેઠકના ઠરાવો તથા કાર્યવાહીનું રેકોર્ડ ચકાસવામાં આવે, તેવી માંગ ઉઠી રહી છે.
લોકોની માંગ સ્પષ્ટ છે પંચાયત લોકશાહીનું મંચ છે, કોઈ વ્યક્તિગત વહીવટનું કેન્દ્ર નહીં. જો નિયમોનું પાલન થતું ન હોય તો જવાબદાર સામે તંત્ર દ્વારા કડક કાર્યવાહી કરવામાં આવે અને ગ્રામજનો તથા ચૂંટાયેલા સભ્યોને તેમનો લોકશાહી અધિકાર મળે.
