સાવલી નાગરિક સહકારી બેન્કની ઐતિહાસિક સિદ્ધિ ધિરાણમાં જોરદાર ઉછાળો, રૂ. 13.08 કરોડના આંકડો પાર

સાવલીની શ્રી સાવલી નાગરિક સહકારી બેન્કે પ્રગતિના ક્ષેત્રે વધુ એક મહત્વપૂર્ણ સિદ્ધિ હાંસલ કરી છે. બેન્ક દ્વારા તા. 21 ઓગસ્ટ 2026ના રોજ કુલ રૂ. 13.08 કરોડનું ધિરાણ કરવામાં આવ્યું હોવાની માહિતી સામે આવી છે. બેન્કની આ સિદ્ધિને ઐતિહાસિક સિદ્ધિ તરીકે ગણાવવામાં આવી રહી છે. બેન્કના પ્રગતિના આંકડાઓની સરખામણી કરવામાં આવે તો વર્ષ 2018ની સરખામણીએ વર્ષ 2026માં ધિરાણ ક્ષેત્રે નોંધપાત્ર વૃદ્ધિ જોવા મળી છે. તા. 31 માર્ચ 2018ના રોજ બેન્કના કુલ 400 ધિરાણ ખાતા હતા, જે વધીને તા. 21 ઓગસ્ટ 2026ના રોજ 680 ધિરાણ ખાતા થયા છે.
ધિરાણની કુલ રકમમાં પણ મોટો વધારો નોંધાયો છે. વર્ષ 2018માં બેન્કનું કુલ ધિરાણ આશરે રૂ. 2.50 કરોડ હતું, જ્યારે હવે આ આંકડો વધીને રૂ. 13.08 કરોડ સુધી પહોંચ્યો છે. એટલે કે બેન્કે ધિરાણ વ્યવસાયમાં નોંધપાત્ર વિસ્તરણ હાંસલ કર્યું છે. બેન્ક માટે વધુ મહત્વની બાબત એ છે કે NPA એટલે કે બિનપરફોર્મિંગ એસેટ્સમાં પણ નોંધપાત્ર ઘટાડો થયો છે. વર્ષ 2018માં કુલ 201 NPA ખાતા હતા, જે હવે ઘટીને માત્ર 42 ખાતા રહ્યા છે. તેવી જ રીતે NPAની કુલ રકમ પણ રૂ. 1.17 કરોડથી ઘટીને રૂ. 0.24 કરોડ થઈ છે.
NPA ટકાવારીના આંકડામાં પણ મોટો સુધારો જોવા મળ્યો છે. તા. 31 માર્ચ 2018ના રોજ NPAની ટકાવારી 45 ટકા હતી, જ્યારે તા. 21 ઓગસ્ટ 2026ના રોજ તે ઘટીને માત્ર 1.82 ટકા થઈ છે. બેન્કના દૃષ્ટિકોણથી આ ઘટાડો મહત્વપૂર્ણ પ્રગતિ તરીકે જોવામાં આવી રહ્યો છે.
બેન્કની આ સિદ્ધિ પાછળ તમામ ડિરેક્ટરોના માર્ગદર્શન સાથે ઉત્સાહી સ્ટાફગણની કામગીરીને મહત્વપૂર્ણ ગણાવવામાં આવી છે. બેન્કના સંચાલન અને કર્મચારીઓ દ્વારા કરવામાં આવેલી મહેનત, ધિરાણ ક્ષેત્રે થયેલી વૃદ્ધિ તેમજ NPAમાં આવેલા ઘટાડાને પગલે બેન્કની કામગીરીમાં સકારાત્મક પરિણામો સામે આવ્યા છે.
બેન્કની આ પ્રગતિ બદલ તમામ ડિરેક્ટરો અને ઉત્સાહી સ્ટાફગણને અભિનંદન અને શુભેચ્છાઓ પાઠવવામાં આવી રહી છે. ‘સહકારથી સમૃદ્ધિ તરફ’ના સંકલ્પ સાથે શ્રી સાવલી નાગરિક સહકારી બેન્ક ઉત્તરોત્તર પ્રગતિના પંથે આગળ વધી રહી છે.